Ikipe y’Ingabo z’Igihugu, APR FC, ntiyitwaye neza mu irushanwa ry’Inkera y’Abahizi yiteguriye kuko yatahanye umwanya wa nyuma, nyuma yo kurirangiza nta kipe n’imwe yaryitabiriye ishoboye gutsinda.
Irushanwa ry’Inkera y’Abahizi ryasojwe kuri iki cyumweru tariki 24 Kanama 2025, ryari ryateguwe n’Ikipe ya APR FC mu rwego rwo kwitegura Shampiyona n’indi mikino, iyi Kipe yegukanye umwanya wa kane nyuma yo gutsindwa na Azama FC ibitego 2-0 byatumye isoza idatsinze n’ikipe n’imwe.
Amahirwe y’Ikipe ya APR FC yashyizweho akadomo ku mukino wayihuje na Azam FC yo muri Tanzania bikarangira itsinzwe ibitego 2-0, bihumira ku mirari kuko nta mukino yigeze itsinda muri iri rushanwa yiteguriye.
Ikipe ya APR FC yinjiye mu mukino hakiri kare kuko ku munota wa 24 w’igice cya mbere William Togui, yageze mu rubuga rw’amahina agerageza gutsinda igitego ariko Yoro Diaby wa Azam FC aramutega agwa hasi hatangwa penalite ariko Cheick Djibril Ouattara arayihusha.
Umukino ugeze ku munota wa kabiri w’inyongera mu gice cya mbere, Zidane Ally Sereri wa Azam FC yatsinze igitego cya mbere nyuma y’amakosa yakozwe n’abakina inyuma ba APR FC ndetse kirangira gutyo.
Mu gice cya kabiri kigitangira ku munota wa 54, Azam FC yatsinze igitego cyayo cya kabiri cyatsinzwe na Yahya Zayd bikomeza gusunikura APR FC ahabi ari nako umukino warangiye.
Byatumye Ikipe ya Police FC yinjije ibitego byinshi muri iri rushanwa ariyo yegukanye Igikombe cy’Inkera y’Abahizi ihabwa miliyoni 5 Frw, mu gihe Azam FC yo muri Tanzania yayikurikiye yahawe miliyoni 2 Frw.
AS Kigali yabaye iya gatatu na APR FC yabaye iya nyuma mu irushanwa yiteguriye zatashye amara masa.
