Ikipe ya Pyramids FC yo mu Misiri yegukanye igikombe cya CAF Champions League itsinze Mamelodi Sundowns yo muri Afurika y’Epfo ibitego 3-2 muri rusange kuba icya mbere itwaye muri iri rushanwa.
Mu mukino wo kwishyura wabaye kuri iki cyumweru tariki 1 Kamena 2025, Pyramids yakiriyemo iya Mamelodi Sundowns, iyi Kipe yayitsinze ibitego 2-1 ihita iyitwara igikombe kuko no mu mukino ubanza amakipe yombi yari yanganyije igitego 1-1 muri Afurika y’Epfo.
Ku munota wa 23, nibwo Mohamed Sharaf Eldin yahinduye umupira imbere y’izamu, usanga Fiston Mayele ahagaze neza atera ishoti atsinda igitego cya mbere.
Mu gice cya kabiri ku munota wa 56, Waldi Elkarti yateye coup franc nziza umupira usanga Ahmed Samy akina n’umutwe atsinda igitego cya kabiri kemejwe hifashishijwe ikoranabuhanga rya VAR.
Ku munota wa 75, Iqraam Raynes wa Mamelodi Sundowns yishyuye igitego cya mbere ku burangare bw’ab’inyuma ba Pyramids.
Pyramids FC yegukanye CAF Champions League ku nshuro ya mbere mu mateka, iba Ikipe ya kane yo mu Misiri yegukanye iri rushanwa.
Pyramids FC irazwi cyane mu Rwanda kuko yasezereye APR FC mu myaka ibiri ishize mu majonjora.
