Indimu ni urubuto rusanzwe rumenyerewe mu Rwanda, rukagira akamaro hakomeye cyane ku buzima bwa muntu kuko zishobora kuribwa ubwazo, kuzivanga mu mazi cyangwa mu cyayi na fanta nk’uko bigarumwaho n’abashakashatsi batandukanye.
Ku mbuga myinshi ziganjemo izandika ku buzima na Siyansi, berekana ko indimu ikungahaye cyane ku butare bwa potassium, calcium, copper ndetse ikagira na vitamine A, B na C, ikagira Fer kandi ni urubuto rutagira ibinure.
1. Indimu zongera ubudahangarwa bw’umubiri
Indimu yongerera umubiri ubudahangarwa kuko ari isoko karemano ya Vitamine C. Iyo Vitamine C ikaba ifasha mu kurinda umubiri indwara.
Iyo umuntu yakoresheje indimu bituma ajya gusoba kenshi. Uko gusoba kenshi bifasha mu gusohora udukoko tubi twa “bacteria” mu mubiri, ibyo rero bikagabanya ibyago byo kurwara indwara zifata urwungano rw’inkari.
Amazi arimo indimu nayo ni meza ku mpyiko, kuko agabanya ibyago byo kugira utuntu tumeze nk’utubuye tujya mu mbyiko (kidney stones).
2. Indimu ifasha abantu bakunda kubabara mu ngingo
Abantu bakunda kugira ikibazo cyo kubyimba mu mavi cyangwa mu bujana, biturutse kuba ikitwa “uric acid” kiba cyabaye kinshi aho hantu, bagirwa inama yo gukoresha indimu kuko yifitemo ubushobozi bwo kuyigabanya. Indimu kandi inongerera umuntu imbaraga, akaba yanakora siporo bityo akagabanya indwara zifata mu ngingo.
3. Indimu zifasha abantu bashaka kugabanya ibiro
Abahanga bavuga ko ibyitwa “pectin fiber” biba mu ndimu, bigabanyiriza umuntu ubushake cyangwa ipfa byo kurya, iyo rero umuntu adashaka kurya cyane, ni imwe mu ntambwe zo gutakaza ibiro kandi mu buryo bwiza budahungabanya ubuzima kandi irwanya ibibazo by’igogora rigakorwa neza.
4. Indimu ifasha mu kugenzura aside mu mubiri “Acid Balance”
Iyo umuntu afite aside nyinshi mu mubiri, biba bimwongerera ibyago byo kugira ibibazo by’uburwayi bitandukanye harimo no kubabara mu ngingo, za Diyabete, kubyimbirwa “inflammation”, indwara z’amagufa, indwara z’uruhu n’ibindi.
Nubwo indimu ubundi igizwe na aside, iyo igeze mu mubiri w’umuntu ihunduka “alkaline” , abaganga basaba umuntu kunywa amazi arimo indimu n’umunyu kuko byombi byifitemo aside ku rwego rwo hejuru, ariko bihinduka “alkaline”, kandi bifasha kuringaniza aside mu mubiri.
5. Indimu ifasha mu bijyanye n’umuvuduko w’amaraso n’imikorere y’umutima
Vitamine n’ubutare bitandukanye biboneka mu ndimu, bifatanya mu gutuma umutima ukora neza. By’umwihariko “Potassium” iba mu ndimu ifasha mu kugabanya umuvuduko w’amaraso mu gihe uri hejuru, naho Vitamine C ikagenzura ibinure bibi “cholesterol”, ikanafasha amaraso gutembera neza mu mubiri.
Indimu yarinda ibibazo bifite aho bihuriye n’umutima harimo nko guturika imitsi yo mu mutwe “stroke” kurwara umutima bitunguranye “heart attack”, ikanasukura amaraso.
6. Indimu ifasha mu kwita ku buzima bwo mu kanwa
Amazi arimo indimu yafasha kurwanya icyo kibazo, kuko ikora nk’umuti wo kurwanya “bacteria”. Indimu ifasha n’abafite ibibazo bikomeye byo kubabara mu menyo cyangwa se kubabara mu ishinya.
Ikindi kandi, “calcium” iboneka mu ndimu ifasha mu gukomeza amenyo, ibyiza ngo ni ugukoresha indimu ifunguye, aside nyinshi yo mu ndimu idafunguye yakwangiza akantu kaba gafunitse iryinyo gatuma rimera nk’irishashagirana.
7. Indimu ifasha mu buzima bw’umusatsi n’uruhu
Vitamine C ni ikintu cy’ingenzi mu buzima bw’uruhu rw’umuntu. Kuko irurinda kurwara kanseri zimwe na zimwe zifata uruhu. Ikindi kandi iyo Vitamine C ifasha umusatsi n’uruhu rumeraho umusatsi guhorana umuzima bwiza.
8. Indimu ikoreshwa mu guhangana n’ibyorezo
Bimwe mu bihugu byo muri Afurika y’ Uburengerazuba bikoresha umutobe w’indimu mu kurwanya cholera cyane ko ari icyorezo gikwirakwizwa na “bacteria”. Ikindi kandi uwo mutobe bawukoresha nka ”antibiotique”. Hari n’ubwo bakoresha indimu mu kwirinda indwara ziterwa na virusi nk’ibicurane.
